燕豪芬絕「細」好路

電視有十幾場直播波睇，當中有場荷甲免費波，勁旅燕豪芬主場對烏德勒支。眾所周知荷甲直播波開「細」率超過九成，冇理由唔信邪，2.29倍咁好分值得跟番鋪。（無线翡翠台周日凌晨１時30分直播）

荷甲今晚有四場上演，當中有五隊下周中要打歐聯或歐洲足協杯，聯賽留力呢一個因素必須要考慮埋，唔好齋以實力強弱作分析。

羅賓揀左燕豪芬買「細」，當然唔係電視直播呢個攤路咁簡單。燕豪芬季前放走雲邦美同朴智星兩大進攻主力，經過季前熱身賽同開咧幾場總算執番好，不過上月底轉會市場關閉前，又經歷另一次地震，今次震央黎自後防，李榮杓同保馬先後去左英超搵食，燕豪芬急急引入列斯加及米高波爾，後防又要大執位。

燕豪芬黎緊下周中歐聯要主場對擅於進攻既史浩克04，今場係唯一試陣機會，相信教練希丁克絕對會以守為主，以保持零失球為目標，等新後防線培養好信心迎接歐聯挑戰。

烏德勒支作客主守

對手烏德勒支開咧後三戰一和二負，表現令人失望，不過呢班波都算有自知之明，往往作客主守，主場出擊先同對手搶攻，上季作客開「細」率接近一半，响出名多波入既荷甲算係異數，今晚睇黎都係一球起、兩球止。

另外三場荷甲，阿積士同阿爾克馬爾對手太弱，要贏唔難，當中阿爾克馬爾殺得性起，絕對有權再大勝一場。至於荷華高斯又被睇小，作客對海倫芬有力再度偷雞。